ລາວອາໂກຣເທັກ ຈົດທະບຽນໃນຕະຫຼາດຫຼັກຊັບລາວ

Contact Us

ລາວອາໂກຣເທັກ ຈົດທະບຽນໃນຕະຫຼາດຫຼັກຊັບລາວ

ພິ­ທີ​ເປີດ​ການ​ຊື້-ຂາຍ​ຮຸ້ນ​ຄັ້ງ​ທຳ​ອິດ​ໃນ​ຕະ­ຫຼາດ​ຫຼັກ​ຊັບ​ລາວ ຂອງ​ບໍ­ລິ­ສັດ ລາວ​ອາ​ໂກຣ​ເທັກ ມະ­ຫາ­ຊົນ ຈັດ​ຂຶ້ນ​ວັນ​ທີ 25 ກັນ­ຍາ 2018 ຢູ່​ຕະ­ຫຼາດ​ຫຼັກ​ຊັບ​ລາວ ໂດຍ​ມີ​ທ່ານ​ນາງ ສາຍ­ສະ­ໝອນ ຈັນ­ທະ​ຈັກ ຫົວ­ໜ້າ​ສຳ­ນັກ­ງານ​ຄະ­ນະ​ກຳ­ມະ­ການ​ຄຸ້ມ​ຄອງ​ຫຼັກ​ຊັບ ແລະ ທ່ານ ວັນ​ຄຳ ວໍ­ລະ​ວົງ ອຳ­ນວຍ​ການ​ໃຫຍ່​ຕະ­ຫຼາດ​ຫຼັກ​ຊັບ​ລາວ ທ່ານ ອຸ­ດົມ ແກ້ວ​ທະ​ວົງ ອຳ­ນວຍ​ການ​ບໍ­ລິ­ສັດ ລາວ​ອາ​ໂກຣ​ເທັກ ມະ­ຫາ­ຊົນ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

ບໍ­ລິ­ສັດ ລາວ​ອາ​ໂກຣ​ເທັກ ມະ­ຫາ­ຊົນ ເຂົ້າ​ຈົດ​ທະ­ບຽນ​ໃນ​ຕະ­ຫຼາດ​ຫຼັກ​ຊັບ​ລາວ​ເປັນ​ທາງ​ການ ໃນ​ວັນ​ທີ 25 ກັນ­ຍາ 2018 ຖື​ວ່າ​ເປັນ​ຮຸ້ນ​ໂຕ​ທີ 9 ແລະ ເປັນ​ຮຸ້ນ​ຕົວ​ທຳ​ອິດ​ໃນ​ຂະ­ແໜງ­ການ​ປາມ​ນ້ຳ­ມັນ​ຂອງ​ຕະ­ຫຼາດ​ຫຼັກ​ຊັບ​ລາວ ເຊິ່ງ​ການ​ຈົດ​ທະ­ບຽນ​ດັ່ງ­ກ່າວ ເປັນ​ອີກ​ບາດ­ກ້າວ​ໜຶ່ງ​ແຫ່ງ​ຄວາມ​ສຳ­ເລັດ​ຂອງ​ບໍ­ລິ­ສັດ ທີ່​ຈະ​ເຮັດ​ໃຫ້​ບໍ­ລິ­ສັດ​ເປັນ​ທີ່​ຮູ້​ຈັກ­ຢ່າງ​ກວ້າງ­ຂວາງ ພ້ອມ​ນັ້ນ ກໍ່​ໄດ້​ເປີດ​ຂາຍ​ຮຸ້ນ​ໃນ​ຕະ­ຫຼາດ​ຫຼັກ​ຊັບ​ລາວ ມູນ​ຄ່າ 1.400 ກີບ​ຕໍ່​ຮຸ້ນ.

ບໍ­ລິ­ສັດ ລາວ​ອາ​ໂກຣ​ເທັກ ສ້າງ­ຕັ້ງ​ປີ 2008 ດ້ວຍ​ທຶນ​ຈົດ​ທະ­ບຽນ 100.000 ໂດ​ລາ​ສະ­ຫະ­ລັດ ຫຼື ປະ­ມານ 870 ລ້ານ​ກີບ ທຸ­ລະ​ກິດ​ໄດ້​ຂະ­ຫຍາຍ­ຕົວ​ຕໍ່​ເນື່ອງ ໄດ້​ເພີ່ມ​ທຶນ​ມາ​ເປັນ 5 ຕື້​ກີບ ໃນ​ປີ 2012 ແລະ ມາ​ເປັນ 40 ຕື້​ກີບ ໃນ​ປີ 2016 ການ​ດຳ­ເນີນ​ທຸ­ລະ​ກິດ​ໄລ­ຍະ​ຜ່ານ​ມາ​ແມ່ນ​ພົບ​ອຸ­ປະ­ສັກ​ຫຼາຍ​ຢ່າງ ເນື່ອງ​ຈາກ​ທຸ­ລະ​ກິດ​ປາມ​ນ້ຳ­ມັນ​ເປັນ​ທຸ­ລະ​ກິດ​ໃໝ່ ສັງ­ຄົມ​ຍັງ​ບໍ່​ເຂົ້າ­ໃຈ ແຕ່​ຍ້ອນ​ຄວາມ​ຕັ້ງ­ໃຈ​ສູງ​ຂອງ​ຜູ້​ບໍ­ລິ­ຫານ ຈຶ່ງ​ສາ­ມາດ​ຍາດ​ໄດ້​ຜົນ­ສຳ­ເລັດ​ສຳ­ຄັນ ເປັນ­ຕົ້ນ​ມີ​ແນວ​ພັນ​ເປັນ​ຂອງ​ຕົນ​ເອງ ໄດ້​ຮັບ​ການ​ອະ­ນຸ­ຍາດ​ຈາກ​ກະ­ຊວງ​ກ່ຽວ­ຂ້ອງ ໃນ​ການ​ຜະ­ລິດ​ນ້ຳ­ມັນ​ກາ​ຊວນ​ຊີ­ວະ​ພາບ B5 ໂດຍ​ມີ​ໂຮງ­ງານ​ທີ່​ມີ​ກຳ­ລັງ​ຜະ­ລິດ 20.000 ລິດ​ຕໍ່​ມື້ ສົ່ງ­ເສີມ​ປະ­ຊາ­ຊົນ​ປູກ ດ້ວຍ​ຮູບ​ການ 2+3 ມີ​ໂຮງ​ສະ­ກັດ​ນ້ຳ­ມັນ​ປາມ ມີ​ໂຮງ­ງານ​ຜະ­ລິດ​ຝຸ່ນ​ສູດ​ສະ­ເພາະ​ແນວ​ພັນ​ປາມ ແລະ ເປັນ​ຕົວ​ແທນ​ຈຳ­ໜ່າຍ​ນ້ຳ­ມັນ​ປາມ​ປຸງ​ແຕ່ງ​ຍີ່­ຫໍ້​ຄຳ ແລະ ກຸ້ງ​ກາ​ມັງ­ກອນ​ພຽງ​ຜູ້​ດຽວ​ໃນ​ລາວ.

Share this post?

Lao Agro Tech

Leave a Reply

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *